अर्थमन्त्री स्वर्णीम वाग्लेले भारत भ्रमणका क्रममा दिएको अभिव्यक्ति निन्दनीय छ । अर्थमन्त्री वाग्लेले एउटा कार्यक्रममा बोल्ने क्रममा नेपालमा भारत विरोधी राष्ट्रवादको अन्त्य भएको बताएका थिए । राजकीय जिम्मेवारीमा रहेका वाग्लेले भारतमै पुगेर जुन अभिव्यक्ति दिए, त्यो नेपालको हित विपरित छ ।
नेपालको राष्ट्रिय स्वार्थको पक्षमा बोल्नु केवल भारत विरोधी हुनु होइन् । नेपाल र भारतबीच कैयौं मतभेद र विवाद छन् । र पनि मित्रवत सम्बन्ध छ । मतभेद र विवादको कुटनीतिक ढंगबाट समाधान खोज्न जति आवश्यक छ, मित्रताको फराकिलो दायरालाई विस्तार गर्न उत्तिकै ध्यान दिन आवश्यक छ । नेपालको हितमा बोल्नुलाई भारत विरोधी गतिविधि मान्नु राष्ट्रविरोधी गतिविधि हो । भारतलाई रिझ्याएर अघि बढ्नकै लागि वाग्लेले अभिव्यक्ति दिएका हुन भने त्यो झन खेदजनक छ । सन् १९५० मा नेपाल आधुनिक युगमा प्रवेश गरेदेखि नै नेपालको हितसँग सम्बन्धित कुनै विषय उठाउनेबित्तिकै त्यसलाई सहजै ‘उग्र राष्ट्रवाद’ वा ‘भारतविरोध’ को संज्ञा दिने एउटा पक्ष छ । अहिले पनि त्यो धारमा सशक्त वाग्ले उभिएका छन् ।
विस २०१९ सालदेखि २०७२ सालसम्म भारतले नेपालमा चार पल्ट नाकाबन्दी लगायो । कालापानीमा भारतीय सेना बसेको लामो समय भयो । लिपुलेक लिम्पियाधुरामा सीमा अतिक्रमण भएको छ । सुस्ता लगायत दर्जन ठाउँमा सीमा विवाद छ । सीमावर्ती क्षेत्रमा भारतले बनाएका बाँधले नेपाली भूभाग डुबान हुँदै आएको छ । नेपाल र नेपाली नागरिकलाई अप्ठारो पर्ने गतिविधि हुँदा त्यसको विरोध गर्नु र नेपालको पक्षमा आवाज उठाउनु भारत विरोधी हुनसक्तैन् । हाम्रा कृषिजन्य उत्पादनहरू-अलैँची, चिया, जुटलगायतका वस्तुहरू-द्विपक्षीय सहमतिअनुसार विना अवरोध भारतीय बजारमा निकासी हुन पाउनुपर्छ भन्नु भारतको विरोध गर्नु हो ?नेपाल र भारतबीच भएको विद्युत व्यापारसम्बन्धी सहमतिअनुसार भारतले नेपालमा उत्पादित बिजुली निर्वाध रूपमा खरिद गर्ने वातावरण बनाउनुपर्छ भन्नु नेपालको हितमा होइन र ? भारतले आफूले रोजेको लगानीकर्ताबाट उत्पादित बिजुली मात्र खरिद गर्छु भन्ने अडान सम्झौताअनुरूप छैन भन्ने आवाज उठाउनु गलत हो ?
नेपालसँग विगतमा गरिएका कतिपय सन्धि–सम्झौताहरू असमान छन् र कतिपय सान्दर्भिक पनि रहेनन् । दोस्रो विश्वयुद्धपछि स्थापित अन्तर्राष्ट्रिय व्यवस्था, अन्तर्राष्ट्रिय कानुन, मूल्य, मान्यता र अभ्यासका आधारमा दुई स्वतन्त्र तथा सार्वभौम मुलुकबीचको सम्बन्ध अगाडि बढाउनुपर्छ । आफ्ना राष्ट्रिय मामिलामा निर्णय गर्ने अधिकार नेपाललाई नै हुनुपर्छ भन्ने प्रष्ट अडान हनुको साटो भारतविरोधी राष्ट्रवादको कुरा गरेर नेपालको राष्ट्रिय हित कसरी रक्षा हुन्छ ? अर्थमन्त्री वाग्लेले गैरजिम्मेवार अभिव्यक्ति दिएको यो पहिलो पल्ट होइन्, यसअघि पनि उनले यस्तै अभिव्यक्ति दिएका थिए । नेपालमा देशप्रेमी नागरिकको ठूलो संख्या छ, नागरिकले निरन्तर राष्ट्रको पक्षमा आवाज उठाइरहन्छन् । शासक गैरजिम्मेवार भएको बेला विरोध गर्ने नागरिकले हो । वाग्लेले निरन्तर मुलुकको स्वार्थ प्रतिकुल अभिव्यक्ति दिएका छन्, त्यो गलत अभिव्यक्तिको डटेर प्रतिवाद गरौँ । नेपाल भारत सम्बन्ध पारस्परिक सहकार्य र समदुरीमा अघि बढ्छ भन्ने मान्यतालाई स्थापित गरौँ ।
