अध्ययन र रोजगारीको खोजीमा दैनिक हजारौंको संख्यामा ऊर्जाशील युवा जनशक्ति बिदेसिइरहेको वर्तमान परिदृश्यमा स्वदेशमै सम्भावना खोज्दै भइरहेका नवीन लगानीहरू मुलुकका लागि आशाका बलिया किरण हुन् । पछिल्लो समय देशको समग्र अर्थतन्त्रमा देखिएको सुस्तता, बजार मागमा आएको संकुचन र व्यवसायिक क्षेत्रमा छाएको निराशाका बीच युवा उद्यमीहरूले देखाइरहेको साहस प्रशंसनीय छ । देशको प्रमुख आर्थिक केन्द्रमध्येको एक बुटवलमा युवा उद्यमी कमलजंग कुँवरले करिब ६ करोड रुपैयाँको लगानीमा अन्तर्राष्ट्रियस्तरको ‘ड्याडिज केक–द प्रिमियम बेकरी’ सञ्चालनमा ल्याएर देशमै केही गर्न सकिन्छ भन्ने सन्देश दिएका छन् ।
लामो समयदेखि आतिथ्य र सेवा क्षेत्रमा क्रियाशील ड्याडिज समूहले एक वर्ष लामो गहन अध्ययन र अनुसन्धानपछि बेकरी उद्योगमा यति ठूलो पुँजी परिचालन गर्नु सामान्य व्यावसायिक कदम मात्र होइन । परम्परागत ढर्रामा चलिरहेको नेपाली बेकरी उद्योगलाई आधुनिक प्रविधि, फ्रेन्च र इटालियन उत्पादन शैली तथा उच्च खाद्य स्वच्छतासँग जोड्ने यो प्रयासले उपभोक्ताको बदलिँदो स्वाद र गुणस्तरप्रतिको चाहनालाई सम्बोधन गर्ने देखिन्छ । ‘कायापलट ल्याउँछौं स्वदेशमै, युवा उद्यमशीलताको सम्मान गरौं’ भन्ने मूल मन्त्रका साथ अघि बढेको यो अभियानले स्वदेशमै अन्तर्राष्ट्रियस्तरको गुणस्तर सम्भव छ भन्ने बलियो सन्देश प्रवाह गरेको छ ।
नेपालको बैंकिङ प्रणालीमा पर्याप्त तरलता थुप्रिएको तर लगानीकर्तामा आत्मविश्वासको अभाव देखिएको वर्तमान अवस्थामा करोडौंका यस्ता लगानीले स्थानीय अर्थतन्त्रलाई चलायमान बनाउन महत्वपूर्ण भूमिका खेल्छन् । यस्ता नवीन उद्यमहरूले एकातिर प्रत्यक्ष तथा अप्रत्यक्ष रूपमा दर्जनौं युवालाई स्वदेशमै रोजगारी सिर्जना गर्छन् भने अर्कोतिर स्थानीय कृषि उपज, दुग्धजन्य पदार्थ र कच्चापदार्थको खपत बढाएर ग्रामीण अर्थतन्त्रलाई समेत टेवा पु¥याउँछन् । सहर केन्द्रित आयातित वस्तुको निर्भरता घटाउन र स्वदेशी ब्रान्ड स्थापित गर्न यस्ता प्रयास कोसेढुंगा साबित हुन सक्छन् ।
यद्यपि, निजी क्षेत्रको एकल उत्साह र साहस मात्र दीर्घकालीन आर्थिक रूपान्तरणका लागि पर्याप्त हुँदैन् । स्वदेशमै पसिना बगाउन चाहने नवप्रवर्तक तथा युवा उद्यमीहरूलाई टिकाइराख्न स्थानीय, प्रदेश र संघीय सरकारको नीतिगत स्पष्टता र अभिभावकत्व अपरिहार्य छ । झन्झटिलो प्रशासनिक प्रक्रियाको अन्त्य, कर प्रणालीमा सहुलियत, व्यावसायिक सुरक्षाको प्रत्याभूति र उत्पादनमूलक क्षेत्रमा सहज कर्जा प्रवाहको वातावरण राज्यले निर्माण गरिदिनुपर्छ । नीतिगत अस्थिरताका कारण उद्यमीहरू निरुत्साहित हुने अवस्थाको अन्त्य नहुनेहो भने मुलुकमा पूँजी पलायनको डरलाग्दो जोखिम छ ।
स्वदेशमै भविष्य निर्माण गर्न कस्सिएका युवा उद्यमीहरूको यो कदम अन्य युवाहरूका लागि पनि प्रेरणाको स्रोत बन्नुपर्छ । जबसम्म देशभित्रै नवीन सोच, आधुनिक प्रविधि र पुँजीको संयोजन गर्ने उद्यमीहरूको राज्य र समाजबाट उचित सम्मान तथा संरक्षण हुँदैन, तबसम्म आर्थिक समृद्धिको राष्ट्रिय आकांक्षा अधुरै रहन्छ । बुटवलबाट सुरु भएको यो व्यवसायिक यात्राले समग्र लुम्बिनी प्रदेश र देशकै उद्यमशीलताको क्षेत्रमा नयाँ ऊर्जा र आत्मविश्वास भर्ने आशा गर्न सकिन्छ ।



