गौतमबुद्ध अन्तर्राष्ट्रिय विमानस्थल पूर्ण क्षमतामा सञ्चालन नहुनु यो क्षेत्रका लागि मात्रै नभई राष्ट्रिय अर्थतन्त्रका लागि गम्भीर चिन्ताको विषय भएको छ । सञ्चालनमा आएको लामो समय बितिसक्दा पनि नियमित अन्तर्राष्ट्रिय उडान नहुँदा विमानस्थल सुनसानप्रायः छ । यही विमानस्थललाई लक्ष्य गरी भैरहवा र आसपासका क्षेत्रमा निजी क्षेत्रले होटल तथा पर्यटन पूर्वाधारमा खन्याएको अर्बौं रुपैयाँको लगानी अहिले गम्भीर जोखिममा परेको छ । लगानीको प्रतिफल नपाउँदा व्यवसायी निराश बनेका छन् ।
पछिल्लो समय भारतसँग थप हवाई प्रवेशमार्ग (एयर रुट) सम्बन्धी सहमति जुटाउने बहसले फेरि चर्चा पाएको छ । भारतले आफ्ना सीमावर्ती विमानस्थलका लागि नेपाली आकाश प्रयोग गर्ने प्रस्ताव गरिरहँदा नेपालले भैरहवा र पोखराका लागि सहज प्रवेशमार्ग माग्नु स्वाभाविक हो। तर, सरोकारवालाहरूको प्रश्न जायज छ- नयाँ एयर रुटको सहमतिले काठमाडौं केन्द्रित उडानलाई सहज बनाए पनि भैरहवाले त्यसको प्रत्यक्ष लाभ कसरी पाउँछ ? केवल एयर रुटको बहसमा अल्झिएर विमानस्थल सञ्चालनको मुख्य दायित्वबाट पन्छिन मिल्दैन ।
भैरहवाको मुख्य समस्या एयर रुट मात्र होइन, नियमित उडानको सुनिश्चितता नहुनु हो । विमानस्थलमा जडान गरिएको इन्स्ट्रुमेन्ट ल्याण्डिङ सिस्टम (आइएलएस) पूर्णरूपमा सञ्चालन गर्न भारतसँग सीमावर्ती हवाई क्षेत्र व्यवस्थापनको प्राविधिक सहमति आवश्यक छ । जाडोयाम र न्यून भिजिबिलिटीमा समेत सुरक्षित अवतरण गराउन सक्ने यो प्रणालीको उपयोग नहुँदा वायुसेवा कम्पनीहरू भैरहवा आउन हिचकिचाइरहेका छन् । अर्कोतर्फ, श्रम स्वीकृति, स्वास्थ्य परीक्षण र भिसा प्रक्रिया जस्ता वैदेशिक रोजगारीका अनिवार्य सेवाहरू अझै काठमाडौं केन्द्रित छन् । यी प्रशासनिक र प्राविधिक गाँठा नफुकाएसम्म भैरहवामा यात्रु र जहाजको चाप बढ्न सक्दैन् ।
विमानस्थल सञ्चालनको विषय अब राजनीतिक आश्वासनमा मात्र सीमित रहनु हुँदैन । सरकार र नेपाल नागरिक उड्डयन प्राधिकरणले ठोस कूटनीतिक र प्राविधिक पहल थाल्न ढिला भइसकेको छ । दुई देशका संयुक्त प्राविधिक टोलीबिच समन्वय गरी आइएलएस प्रणाली सञ्चालनको वातावरण तत्काल बनाउनुपर्छ । साथै, अन्तर्राष्ट्रिय वायुसेवा कम्पनीहरूलाई आकर्षित गर्न विशेष सहुलियत प्याकेज ल्याउन र वैदेशिक रोजगारका सबै सेवा भैरहवाबाटै सहज रूपमा उपलब्ध गराउन सरकार गम्भीर बन्नुपर्छ ।
निजी क्षेत्रको विश्वास टिकाइराख्न र राज्यको अर्बौंको लगानीलाई सार्थक बनाउन भैरहवाको आकाशमा नियमित अन्तर्राष्ट्रिय जहाज उडेको देखिनुपर्छ । निरर्थक बहस र छलफलले मात्रै व्यवसायीको मुहारको निराशा हट्ने होइन्, देखिने गरी काम हुनुपर्छ, जसले आशा जगाउन सकोस् ।



